My Lord A-Hunting
1787
Type: song
Chorus.-My lady’s gown, there’s gairs upon’t,
And gowden flowers sae rare upon’t;
But Jenny’s jimps and jirkinet,
My lord thinks meikle mair upon’t.
My lord a-hunting he is gone,
But hounds or hawks wi’ him are nane;
By Colin’s cottage lies his game,
If Colin’s Jenny be at hame.
My lady’s gown, &c.
My lady’s white, my lady’s red,
And kith and kin o’ Cassillis’ blude;
But her ten-pund lands o’ tocher gude;
Were a’ the charms his lordship lo’ed.
My lady’s gown, &c.
Out o’er yon muir, out o’er yon moss,
Whare gor-cocks thro’ the heather pass,
There wons auld Colin’s bonie lass,
A lily in a wilderness.
My lady’s gown, &c.
Sae sweetly move her genty limbs,
Like music notes o’lovers’ hymns:
The diamond-dew in her een sae blue,
Where laughing love sae wanton swims.
My lady’s gown, &c.
My lady’s dink, my lady’s drest,
The flower and fancy o’ the west;
But the lassie than a man lo’es best,
O that’s the lass to mak him blest.
My lady’s gown, &c.
————-
Home
Parallel translations, the parallel world of translating poetry
Poetry in Russian (youd have to select Russian in the language switch area, otherwise you wont be able to read poems in Russian)
Robert Burns, (born January 25, 1759, Alloway, Ayrshire, Scotland—died July 21, 1796, Dumfries, Dumfriesshire), national poet of Scotland. He wrote lyrics, ballads and songs in Scots and in English. He was also notable for his amorous adventures and his rebellion against religion and morality.